Երէկ Աւագ Հինգշաբթի, Սուրբ Գրիգոր Մայր տաճարին մէջ մատուցուցաւ Սուրբ պատարագ ի Յիշատակ Վերջին ընթրիքի:Միաժանամանակ Սուրբ Գրիգոր Լուսաւորիչ կրթական հաստատութեան եւ Մարի Մանուկեան վարժարանի աշակերտները ստացան Ս. Հաղորդութիւն: Խոստովանանքը կարդացուեցաւ երկու դպրոցներու աշակերտներուն կողմէ:
Երեկոյեան կատարուեցաւ Ոտնլուայի արարողութիւն, որ Յիսուսի խոնարհութիւնը ցոյց կու տայ: Սրբազան Հայրը լուաց տասնեակ մը դպիրի զգեստ հագած՝ դպրոցական փոքրիկ աշակերտ- աշակերտուհիներուն ոտքերը:Ծնողները եւ ներկայ հաւատացեալները յուզուած կը հետեւէին արարողութեան:
Իսկ գիշերը տեղի ունեցաւ Խաւարումի արարողութիւն.որ կը խորհրդանշէ Յիսուսի մատնութիւնը, ձերբակալութիւնը, չարչարանքը, արեգակի խաւարումը: Կարդացուեցան եօթը աւետարանները. վերջինը կատարեալ մթութեան մէջ: Խորհրդածելու, ներամփոփուելու, աղօթելու եւ Աստուծմէ քաւութիւն հայցելու խորհրդաւոր պահն էր եւ հաւատացեալները խոր երկիւղածութեամբ հետեւեցան հոգեպարար արարողութեան:
